Dit is weer tyd vir vermaak lig kuns samesyn familie musiek die Lig en Ritme Fees
20 - 22 Augustus 2025
Die Fees vind plaas van 20 – 22 Augustus op die terrein van NG Tygerpoort en Laerskool Tygerpoort in die ooste van Pretoria.
Op Woensdag en Donderdag (20-21 Augustus) vind die voor-Fees produksie, “Rooi”, in die kerkgebou plaas – saam met ‘n heerlike ete en kuiergeleentheid in die Teaterkafee op die terrein.
Die hooffees vind hierdie jaar op Vrydag (22 Augustus) op die sportvelde van Laerskool Tygerpoort plaas.
Die program
20 Aug
WOENSDAG, 20 AUGUSTUS
17:30 | Teaterkafee
19:30 | “Rooi” in die kerkgebou
21 Aug
DONDERDAG, 21 AUGUSTUS
17:30 | Teaterkafee
19:30 | “Rooi” in die kerkgebou
Rooi is ’n kreatiewe herverbeelding van die Bybelse verhaal oor Ragab, die vrou wat haar stad en haar verlede agtergelaat het om deel te word van ‘n nuwe en onverwagse toekoms. Hierdie verhoogstuk verweef historiese feite met fiktiewe elemente om Ragab se innerlike stryd, haar moed en haar menslikheid opnuut tot lewe te bring.
Die aangrypende stuk nooi jou om na te dink oor geloof in moeilike tye, die trauma van oorlog, die hoop in liefde en uiteindelik hoe om vry te word van jou verlede. Die woorde en musiek neem jou op die emosionele reis van ‘n karakter in die Bybel wat deur die Here gebruik word op maniere wat niemand verwag het nie.
Die rol van Ragab word vertolk deur die talentvolle aktrise en televisie-persoonlikheid, Jennifer Myburg.
Saam op die verhoog is mede-spelers en musikante: Zander van der Westhuizen (skrywer van die stuk), Lizelle le Roux en Heini Berner.
22 Aug
VRYDAG, 22 AUGUSTUS
Hooffees op die sportvelde van Laerskool Tygerpoort
13:15 –– Fees open
L&R Lounge
Voel soos ‘n eregas deur jou plek in die “Lounge” te bespreek. Hier ontvang jy spyseniering, drinkgoed, ‘n plek om te ontspan en afgebakende sitplek om alles op die verhoog te sien. Hierdie eksklusiewe tent het beperkte plek! Bespreek betyds.
Kosmark
Smullekker kos by die stalletjies sal verseker dat jy nie honger word nie. Kom geniet – Kerrie & rys, Hoender “strips”, Burgers, Pregos, Boereworsrolle, Nachos, Pannekoek, Sop & brood en Roomys.
Daar is ook wyn, water en koeldrank te koop. (Geen drank mag van buite af op die Feesterrein toegelaat nie)
Feesmark
Stap deur ons feesmark en koop onder andere lekkernye, gebak, speelgoed, juweliersware, heerlike kaas en pesto’s.
Kinderpretpark & Karnavalstraat
Hierdie jaar bied die toegangskaartjie volle toegang tot die groot Gladiator Speelpark vir laerskoolkinders. Hierdie park is op die skool se B-veld en Karnavalstraat is vol speletjies om elke kind die hele dag besig te hou.
GROOTfm 90.5
Ons media vennoot, GROOTfm 90.5 saai weer regstreeks vanaf die Fees uit op die dag. Francois van Rensburg is hierdie jaar se seremoniemeester.
Gelukkige Trekking
Staan die kans om groot pryse in hierdie jaar se gelukkige trekking te wen. Spandeer meer as R200 by die Kosmark of Tygerplein Winkel op die dag en kry outomaties ‘n kans om in te skryf vir die aand se trekking.
Ander vermaak
Soos altyd – sal daar ‘n paar verrassings op die Fees wees – dalk sien jy ‘n sirkusnar of kry die kans om snaakse foto’s vir jou sosiale media te neem.
Buitelug-verhoog program
15:00 Tygies Pom Poms
15:15 Tygies Senior Marimba-orkes
15:30 Tygies Revue – Rev it up
16:00 Affie Konsertorkes
16:45 Kate Deen – 2024 Sing Dit! Wenner
17:00 Alouise
17:30 –– ONS op die Buitelug-verhoog
ONS is ’n splinternuwe Afrikaanse duo, wat uit twee TUKS – studente bestaan.
Marco van Deventer, ook bekend vir sy suksesvolle sosiale-mediablad, “Wees ‘n man,” en Ruvé Erasmus, het vir die eerste keer aandag getrek toe dié twee saam TikTok-video’s begin maak het.
Dit was egter Ruvé se broer se idee dat die twee – sy suster en sy pel – saam moet sing. Toe Marco en Ruvé mekaar eindelik by die einste broer se 21ste verjaardag ontmoet, besluit hulle om saam koffie te gaan drink om te gesels oor Ruvé se broer se voorstel. Kort daarna het hulle die sosiale-mediawêreld betree onder die naam ‘ONS’, en die res is soos hulle sê geskiedenis.
Marco erken vol selfvertroue dat hy in die musiekgroep geglo het van die eerste minuut af (en vir Ruvé moes oortuig vir weke lank), maar bly is dat hy volhard het. ONS is baie opgewonde oor wat die toekoms vir hulle inhou en hoop om nog baie lekker musiek, wat ’n wye gehoor dien, daarbuite te sit.
18:30 –– Lig-ballonne versier
Hierdie jaar gee ons aan gesinne, vriendekringe of individue ‘n kans om ‘n boodskap van hoop op ‘n spesiale ballon te skryf. Hierdie ballonne word met helium gevul wat vas is aan ‘n gewig. Nadat boodskappe op die ballonne geskryf is sal die ballonne op spesiale plekke orals oor die veld geplaas word en die liggie binne in die ballon aangeskakel word.
Ons gaan ‘n spesiale tyd in die Feesprogram skep waarin gesinne, vriendekringe en individue saam met mekaar kan sit en ‘n oomblik neem om hulle groep / individu se ballon te versier.
Koop en bestel vooraf vir elke groep / individu die hoeveelheid ballonne wat jy wil versier vir hierdie baie spesiale oomblik in die program!
19:00 –– Jo Black op die Buitelug-verhoog
Jo Black is gebore as Jo Engelbrecht en het in die Noorde van Pretoria grootgeword waar hy vandag steeds woon.
‘n Sanger met ‘n passie vir mense. Bekend vir sy groot baard en diep stem, het hy ‘n huishoudelike naam geword wat ‘n passievolle, outentieke en rou uitvoering van inspirerende liedjies in ‘n toeganklike rockstyl lewer. Met ‘n reputasie as Suid-Afrika se hipster met die groot hart het hy bekend geword, nie net vir sy musiektalent nie, maar ook vir sy toewyding om ander te inspireer en op te hef.
‘n Trots Suid-Afrikaanse musikant wie se lirieke die gewig van positiewe waardes dra, en ander uitdaag om beter weergawes van hulself te wees. Sy musiek en stories resoneer met jonk en oud, en die impak strek ver buite die grense van die musiekbedryf. Hierdie persoonlikheid het die harte van miljoene verower met sy aansteeklike energie en opregte warmte.
Sy leuse is om almal soos iemand te laat voel, want niemand verdien om soos ‘n niemand te voel nie.
Ten spyte van drie albums wat onderskeidelik goud, platinum en multi-platinum status bereik het, is Jo ook bekroon met onder andere SAMA, Woordfees, verskeie Ghoema-, Tempo- en Aitsa-toekennings.
Hy sing van skepe en hoop, en tussendeur die liedjies vertel hy stories wat mens net weer herinner, “dat dit alles net genade is”.
20:00 –– Die Piesangskille op die Buitelug-verhoog
Die Piesangskille is ‘n Afrikaanse musiekduo van die Noordwes-Universiteit se Potchefstroom-kampus, bestaande uit Daniël Marais (vokaal) en Johan Balt (kitaar en vokaal). Die groep het in 2023 bekendheid verwerf met hul humoristiese treffer Mal Maandagaande, ‘n tong-in-die-kies weergawe van studentepartytjies, wat vinnig ‘n aanlyn sensasie geword het.
Hul debuutalbum, Almal Gly, is ‘n eerlike weergawe van hul lewens as studente, met liedjies soos Lyntjie, Inge 2, Teenoorgestelde Balans en Pen & Papier wat temas van jeug, liefde en selfontdekking ondersoek. Die duo se klank kombineer Afrikaanse pop en indie-elemente, beïnvloed deur groepe soos Glaskas, éF-éL en Die Tuindwergies
21:00 –– Lig-ballonne oomblik
Ons borge
